magenta c.

***



...Und immer wenn ich wiedermal en Schue voll usezoge han,
de seelisch Sockewechsel mach und nur no us Verzwiiflig lach,
denn chunt au mitem Schmetter gli, de Wunsch nach braver Bourgeoisie
Ich wett vom Huufe sii.

Acht bis zwölf und zwei bis sächs.
Zischtig Jassclub, Friitig Sex,
niene z höch und niene z tüüf
s eige Dänke hebt nur Hüf.
Gfreuti Frau, gfreuti Chind,
sälte Striit, sälte Find...
Normal....?

Ich hett mit zweizwänzgi scho mini Prinzipie und eso
und au die nächschte 20, 30 Jahr die gliiched alli sich ufs Haar
s gaht nie durab, s gaht nie durue, drum han ich mini Seelerueh,
ich wett en Bürger sii.

Nie es Gfühl wo durebrännt
will me Gfühl fasch nüme kännt,
d Mehrzahl gilt und isch im Rächt
alls was andersch isch isch schlächt.
Zwüsched Sturm und Extrem
isch nur d Mitti bequem...
Normal....?

Uf d Frag: Wie gahts? Da seit ich gschnäll: me schlat sich dure... weisch ja, gäll?
Me setzt sich lieber nöd z fescht ii und fühlt sich sicherer debii.
Wäm nützt de Himmel, d Seeligkeit,
me gheit bloss tüüfer wänn me gheit,
ich wett nüüt bsunders sii.

Grosse Ehrgiiz isch für d Chatz
lieber schwiigsch und hebsch de Latz,
d Würklichkeit isch bloss en Fluech
chunnt per Färnseh gschnäll uf Bsuech.
Kein Momänt wo me kämpft,
me läbt grad, me läbt dämpft...
Normal...?

Ich hett was d Liebi anbelangt es fertigs Schema i de Hand
ich miechs wie tuusig andri au:
Us gfühl wird Gwohnet nadisnah,
en Kuss bim Cho, en Kuss bim Ga,
ich wett wie d Mehrzahl sii:

Wer sich nüd wie all benimmt,
isch en Komische wo spinnt,
denn sogar wenn eine pennt,
will me, dass er d'Regle kännt.
So isch guet – so isch schlächt,
das isch falsch - das isch rächt...
Normal ....?

Und immer wänn ich wieder mal en Schueh voll usezoge ha,
wenn mini Unuusglicheheit sich sehnt nach Mittelmässigkeit,
dänn dänk ich nah – und merk debi:
Ich tuusch mich lieber doch nöd ii, ich wett kein Durchschnitt sii:

Lieber tramp ich öppedie au i tüüfi Löcher ie,
doch ich bhalt mer d Möglichkeit vonre spötre Seeligkeit,
lieber heiss als bloss lau,
lieber ganz als bloss flau...



***